Rev 10 | WSK | STEP | Mel imi menaram, se ani engel aora bo duruk wonong beteram tai kapawaram se arigem. Nu taiti nuwi numi te kaluwuram, se magulep bo ko supuling te anikaso. Ko koma motam mu worem iwita, se ko doleng mu ngatalek kanira ale dirimawara wore iwita.

Revelation of John 10

Engel mu tam gawa batoga patunga gotek bo John tuam se no lakumam

1 Mel imi menaram, se ani engel aora bo duruk wonong beteram tai kapawaram se arigem. Nu taiti nuwi numi te kaluwuram, se magulep bo ko supuling te anikaso. Ko koma motam mu worem iwita, se ko doleng mu ngatalek kanira ale dirimawara wore iwita. 2 Nu tam gawa batoga gotek bo ulal awuram ale kuting te iluwaram. Ale nu ko doleng sengam mu gagi tuagu awete beteram, ale ko doleng ngas mu ali awete beteram. 3 Ale nu sail karogo airam, se ko nirung mu lion niaso iwitata. Ale nu airam mu pure 7 papak maman nirung kapaman. 4 Se ani pure den balman mu batagikko negawerem, se kuring bo duruk wonong te wore iwita balam se ikiem, “Den pure 7 balman wore me bataguruko, ka ikia ningi la bitar se anirukko.”

5 Se engel gagi se ali awete sanamiwaram se arigem, mu ko kuting sengam mu patowaram garukuam se duruk wonong atumu iram bagakaso. 6 Ale nu Kaem tom suen biya bagoso, taiti kuali ko mel mel, ali se ko mel, gagi se ko mel suen biya nu la beteram se aniso, mu ko nup te nunguningta nunguning mam, ale balam, “Tom menaram,” mam. “Se Kaem tom bo karogo me kimi bitirukko! Mena. ^{▼▼Rev 10:6 Kaem kariimet giris palagomonko kam maiya biya nunga kimi bitawoso: 2 Peter 3:9-10. Tom mu menaram taiwoso.} 7 Engel bo 7 mu ko biugel itugumok se niaruk, mu Kaem ko ikia ulengkala yumura te anikaso mu bitirukko, nu giram ko ura kari prophet alo nunga maonam iwitata.”

8 Se kuring ani maingkala duruk wonong te tai kaparam se ikiem, mu akingtala aga maonam, “Namar ale batoga, engel gagi se ali awete sanamiwoso mu ko kuting te ulalawu beteram se aniso mu toko,” mam.

9 Se ani engel kote namerem ale nu batoga gotek iluwaram mu aisukko manem. Se nu aga maonam, “To ale noko,” mam. “Kiring ningi mu kaemak iwita yaman nuam, bare tagu ningi mu seselak se ko gara ka morukkowo.” ^{▼▼Rev 10:9-10 Ezekiel betela batoga gotek bo no lakumam asele Kaem kuring tam ale balam, ikup biya Israel alo nunga irokkowo ma balam: Eze 2:8-3:3. Batoga gotek mu yaman nuam, mu awuk, mu Kaem kote tairam. Bare mu seselak tala, mu awuk, mu ikup aratukkowo.}

10 Se ani batoga gotek engel kuting te aniram mu taem ale naem, se agiring ningi mu kaemak iwita, yaman nuam. Bare ani no lakumem, mu atagu ningi seselak pagam. Se nu aga maonam, “Ni akingtala mel udagi ali sor suen biya ko kariimet nungumik te aratukko, kariimet nungumik kirker se nunga den kirker, se ali sor supuling alo mu nungumik te aratukko mu ko den baluko.”

11